កីឡា៖ អ្នកចាំទី Thibaut Courtois របស់ក្លឹប Real Madrid បានប្រកាសច្បាស់ៗកាលពីថ្ងៃព្រហស្បតិ៍ម្សិលមិញនេះថា គេនឹងមិនបង្ហាញខ្លួនជាមួយក្រុមជម្រើសជាតិបែលហ្សិក ក្រោមការដឹកនាំរបស់គ្រូបង្វឹកបច្ចុប្បន្នគឺលោក Domenico Tedesco ទៀតនោះទេ។ គួរឱ្យដឹងថា Thibaut Courtois បានចាកចេញពីក្រុមជម្រើសជាតិប៊ែលហ្សិក និងមិនបានបង្ហាញខ្លួនក្នុងព្រឹត្តិការណ៍ EURO ២០២៤ នោះឡើយ បន្ទាប់ពីរូបគេមានទួំនាស់ជាមួយគ្រូបង្វឹក Tedesco កាលពីឆ្នាំមុន ស្របពេលតំណែងរបស់គេត្រូវបានជំនួសដោយកីឡាករ Koen Casteels។

នៅលើបណ្ដាញសង្គមផ្ទាល់ខ្លួន Thibaut Courtois និយាយថា៖ "ខ្ញុំមានអារម្មណ៍ថាពិតជាមានកិត្តិយសណាស់ដែលអាចបានពាក់អាវជម្រើសជាតិប៊ែលហ្សិក។ ខ្ញុំមានក្ដីសុបិន្តថានឹងអាចបង្ហាញខ្លួនជាមួយឯកសណ្ឋានជម្រើសជាតិលើសពី ១០០ដង"។ សារដដែលបញ្ជាក់ថា យ៉ាងណាក្ដីជារឿងគួរឱ្យសោកស្ដាយ បន្ទាប់ពីហេតុការណ៍ដែលកើតឡើងរវាងគេជាមួយគ្រូបង្វឹកជម្រើសជាតិ លោក Domenico Tedesco គេនឹងមិនចូលរួមជាមួយជម្រើសជាតិប៊ែលហ្សិកដែលស្ថិតក្រោមការដឹកនាំរបស់គ្រូបង្វឹករូបនេះឡើយ។ 

គួរបញ្ជាក់ថា កីឡាករអ្នកចាំទីវ័យ ៣២ឆ្នាំរូបនេះបានរងរបួស និងអវត្តមានពីលើទីលាន ប៉ុន្តែបានជាសះស្បើយទាន់ពេលតែម្តង និងជួយឱ្យ Real Madrid ឈ្នះជើងឯក UEFA Champions League កាលពីខែមិថុនាកន្លងទៅ ដោយគេបានបញ្ជាក់ថា សមាគមបាល់ទាត់ប៊ែលហ្សិកបានទទួលយកហេតុផលដែលនាំទៅដល់ការសម្រេចចិត្តរបស់ខ្លួន។

យុទ្ធសាស្ត្ររបស់ Tedesco បានធ្វើឱ្យមានការចោទជាសំណួរពីអ្នកគាំទ្រថា តើលោកជាបុគ្គលស័ក្ដិសមសម្រាប់ការងារនេះដែរឬទេ? បន្ទាប់ពីបែលហ្ស៊ិកបានធ្លាក់ចេញពីព្រឹត្តិការណ៍ UEFA Euro ២០២៤ នេះក្រោមថ្វីជើងក្រុមជើងឯករងបារាំងក្នុងវគ្គ ១៦ក្រុមចុងក្រោយ។ អ្នកចាត់ការសញ្ជាតិអាឡឺម៉ង់ ដើមកំណើតអ៊ីតាលី លោក Domenico Tedesco បានចូលកាន់តំណែងកាលពីខែកុម្ភៈ ឆ្នាំ២០២៣ និងបានចុះហត្ថលេខាលើកិច្ចសន្យាបន្ត មុនពេលព្រឹត្តិការណ៍ EURO 2024 ចាប់ផ្តើម៕